ഞാൻ മടങ്ങുന്നു

ഞാൻ മടങ്ങുന്നു.

മടുത്തു.

കഴിഞ്ഞ കുറേ നൂറ്റാണ്ടുകളായി

നിങ്ങൾ ഇതു തന്നെ ചെയ്യുന്നു.

കൊല്ലുന്നു,

കത്തിക്കുന്നു,

ഞാൻ സൃഷ്ടിക്കാത്ത

മതങ്ങളുടേയും

ഞാനറിയാത്ത

ദൈവങ്ങളുടേയും പേരു പറഞ്ഞ്

പേയിളകി നടക്കുന്നു.

ഞാൻ മടങ്ങുന്നു.

മടുത്തു.

ഓർമ വച്ച കാലം തുടങ്ങിയതാണ് -

ഞാനീ ചുറ്റൽ,

തല കറങ്ങിയിട്ടില്ല ഒരിക്കലും.

ഉള്ളു ചുട്ടുപൊള്ളുന്ന ഇരുമ്പ് -

തിളച്ചു മറിയുകയാണ്,

ചൂടെടുത്തിട്ടില്ല തരിമ്പും.

ഇതൊക്കെ കാണുമ്പോൾ തലപെരുക്കുന്നു

ഉള്ള്

ചുട്ടുപൊള്ളുന്നു.

ഈ കറക്കം നിർത്തണം.

അങ്ങകലെ ഒരു നിമിഷം കണ്ണു ചിമ്മാതെ

എന്നെനോക്കി നിൽക്കുന്ന

ആ നക്ഷത്രമില്ലേ...

അവന്റെ നേർക്ക് കുതിക്കണം

അവനെ പുണരണം

ഉരുകി അവനിൽ ചേരണം...

ഹരികൃഷ്ണൻ ജി. ജി.