തെറ്റായിരുന്നു...

തെറ്റായിരുന്നു,
മഴ എല്ലാവർക്കും ഒന്നാണെങ്കിലും
അത് ഓരോരുത്തർക്കും ഓരോന്നാണ്-
എന്നു പറഞ്ഞത്.
മലയൊന്നാകെ ഇടിച്ചുകുത്തി വരുമ്പോൾ
പ്രണയമുള്ളവന്റെ മഴയും,
വീടില്ലാത്തവന്റെ മഴയും,
ഇഷ്ടമല്ലെന്ന് കേട്ടവന്റെ മഴയും,
കുടയെടുക്കാതെ വീടുവിട്ടവന്റെ മഴയും
ഒന്നാവും.
അതിന്റെ താളത്തിൽ ഒരായിരം കണ്ണുകൾ
പെയ്തിറങ്ങും.
കലങ്ങിമറിഞ്ഞ് പാഞ്ഞകലുന്നത്
പ്രണയമാണ്,
വിരഹമാണ്‌,
ജീവിതമാണ്...
അതിലേക്ക് നോക്കിയിരുന്നുകൊണ്ട്
എങ്ങനെ പറയാനാകും,
മഴ എല്ലാവർക്കും ഒന്നാണെങ്കിലും
അത് ഓരോരുത്തർക്കും ഓരോന്നാണെന്ന്...!
ഹരി